Jobi 40

BIBLA SHQIP—PËRKTHIMI DIODATI I RI I RISHIKUAR



40:1 Zoti vazhdoi t`i përgjigjet Jobit dhe tha:

40:2 "Ai që kundërshton të Plotfuqishmin, a dëshiron vallë ta korrigjojë? Ai që qorton Perëndinë, t`i përgjigjet kësaj pyetjeje".

Jobi pranon shpirtvogëlsinë e tij para Perëndisë dhe veprave të tij

40:3 Atëherë Jobi iu përgjigj Zotit dhe i tha:

40:4 "Ja, jam shpirtvogël, çfarë mund të të përgjigjem? E vë dorën mbi gojën time.

40:5 Kam folur një herë, por nuk do të flas më; po, dy herë, por nuk do të shtoj asgjë".

Perëndia e sfidon Jobin të gjykojë njerëzit e këqij

40:6 Atëherë Zoti iu përgjigj Jobit në mes të furtunës dhe i tha:

40:7 "Çohu, ngjishe brezin si një trim; unë do të të pyes dhe ti do të më përgjigjesh.

40:8 A dëshiron pikërisht të anulosh gjykimin tim, të më dënosh mua për të justifikuar vetveten?

40:9 A ke ti një krah si ai i Perëndisë dhe a mund të të gjëmojë zëri sa zëri i tij?

40:10 Stolisu, pra, me madhështi dhe madhëri, vishu me lavdi dhe me shkëlqim.

40:11 Jepu rrugë tërbimeve të zemërimit tënd; shiko tërë mendjemëdhenjtë dhe uli,

40:12 shiko tërë kryelartët dhe poshtëroji, dhe shtypi njerëzit e këqij kudo që të ndodhen.

40:13 Varrosi të tërë në pluhur, mbylli në vende të fshehta.

40:14 Atëherë edhe unë do të lëvdoj, sepse dora jote e djathtë të ka siguruar fitore.

Perëndia e krahason forcën e Jobit me atë të behemothit dhe të Leviatanit.

40:15 Shiko behemothin që e kam bërë njëlloj si ti; ai ha barin si kau.

40:16 Ja, forca e tij qëndron në ijet dhe fuqia e tij në muskujt e barkut të tij.

40:17 E lëkund bishtin e tij si një kedër; nervat e kofshëve të tij janë të thurura mirë.

40:18 Kockat e tij janë si tuba prej bronzi; kockat e tij janë si shufra hekuri.

40:19 Ai është e para nga veprat e Perëndisë; vetëm ai që e bëri mund t`i afrohet atij me shpatën e tij.

40:20 Ndonëse malet prodhojnë ushqim për të, dhe aty tërë kafshët e fushave dëfrehen,

40:21 ai shtrihet nën bimët e lotusit, në vende të fshehura në kallamishte dhe në moçale.

40:22 Bimët e lotusit e mbulojnë me hijen e tyre, shelgjet e përroit e rrethojnë.

40:23 Lumi mund të dalë nga shtrati i tij, por ai nuk ka frikë; është i sigurt nga vetja e tij, edhe sikur Jordani të sulej kundër gojës së tij.

40:24 Kush, pra, mund ta zërë nga sytë apo t`i shpojë flegrat e hundës me gremça?

Shpërndaje këtë